(សកលវិទ្យាល័យភ្នំពេញអន្តរជាតិ) នារសៀលថ្ងៃថ្ងៃសុក្រ ១កើត ខែកត្តិក ឆ្នាំរោងឆស័ក ពុទ្ធសករាជ ២៥៦៨ ត្រូវនឹងថ្ងៃទី១ ខែវិច្ឆិកា ឆ្នាំ២០២៤ ឯកឧត្តម ឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា តំណាង អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានចូលរួមក្នុង ពិធីបើកដំណើរការយុទ្ធនាការភ្នំពេញស្អាត ឆ្នាំ២០២៤ ក្រោមអធិបតីភាព ឯកឧត្តម ហ៊ុន ម៉ានី ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ និងជាប្រធានក្រុមប្រឹក្សាភិបាលគម្រោងស្អាត អមដោយ ឯកឧត្តម និងលោកជំទាវ រដ្ឋលេខាធិការក្រសួងពាក់ព័ន្ធ តំណាងរដ្ឋបាលរាជធានីភ្នំពេញ និងអស់លោក-លោកស្រី យ៉ាងច្រើនកោះករ។

ឯកឧត្តម ហ៊ុន ម៉ានី ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ និងជាប្រធានក្រុមប្រឹក្សាភិបាលគម្រោងស្អាត បានលើកឡើងថា៖ ឆ្នាំ 2024 នេះគឺជាការគម្រប់ខួបលើកទី 8 នៃការបង្កើតគម្រោងស្អាត និងយុទ្ធនាការភ្នំពេញស្អាត។ ខួបទី 8 នេះបានបង្ហាញពីភាពអស្ចារ្យភាពជោគជ័យ និងកិច្ចខិតខំប្រឹងប្រែងរបស់ក្រុមការងារប្រតិបត្តិ និងទូតសុឆន្ទៈស្អាត ព្រមទាំង ឯកឧត្តម លោកជំទាវ អស់លោក-លោកស្រី ដែលមានវត្តមាននៅទីនេះ។ គម្រោងស្អាតត្រូវបានបង្កើតឡើងក្នុងគោលបំណងប្រមូលផ្ដុំតួអង្គពាក់ព័ន្ធ បង្កើតឲ្យមានសំឡេងតែមួយ ពីសំណាក់ស្ថាប័ន អង្គភាព អាជ្ញាធរដែនដីគ្រប់លំដាប់ថ្នាក់ អង្គការ សមាគម នៅគ្រប់មជ្ឈដ្ឋាន ដើម្បីសម្រេចបានចក្ខុវិស័យរួម ក្នុងការចូលរួមលើកកម្ពស់មេត្រីភាពបរិស្ថាន ស្វែងរកបញ្ហាប្រឈមឈានទៅរកដំណោះស្រាយរួម និងដើម្បីអប់អំអំពីការវេចខ្ចប់សំរាមឲ្យបានត្រឹមត្រូវទៅដល់សាធារណជនគ្រប់ស្រទាប់វណ្ណៈ។

ពិធីបើកនេះបានបញ្ចប់នៅថ្ងៃខែឆ្នាំដដែលដោយទទួលបានផ្លែផ្កាជាទីគាប់ចិត្ត។