សិក្ខាសាលាផ្សព្វផ្សាយ ស្តីពី «ប្រព័ន្ធអនុគ្រោះពន្ធន័រវេស (Norwegian Generalized System of Preference)»
28 Oct, 2024 16:24 PM | 3 weeks ago
សិក្ខាសាលាផ្សព្វផ្សាយ ស្តីពី «ប្រព័ន្ធអនុគ្រោះពន្ធន័រវេស (Norwegian Generalized System of Preference)»
--------------------------------
(រាជធានីភ្នំពេញ)៖នាព្រឹកថ្ងៃចន្ទ ១១រោច ខែអស្សុជ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី២៨ ខែតុលា ឆ្នាំ២០២៤ នៅសណ្ឋាគារសាន់ & មូន រីវើសាយ ឧកញ៉ា បណ្ឌិត តាន់ មុន្នីវណ្ណ អនុប្រធានសភាពាណិជ្ជកម្មកម្ពុជា តំណាងដ៏ខ្ពង់ខ្ពស់ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា បានអញ្ជើញចូលរួមជាភ្ញៀវកិត្តិយសក្នុងសិក្ខាសាលាផ្សព្វផ្សាយ ស្តីពី «ប្រព័ន្ធអនុគ្រោះពន្ធន័រវេស (Norwegian Generalized System of Preference)» ក្រោមអធិបតីភាពដ៏ខ្ពង់ខ្ពស់ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម ព្រមទាំងវត្តមាន លោកជំទាវ Astrid Emilie Helle ឯកអគ្គរាជទូតន័រវេសប្រចាំព្រះរាជាណាចក្រកម្ពុជា និង ថ្នាក់ដឹកនាំមកពីក្រសួង-ស្ថាប័នជាច្រើនរូប។
សិក្ខាសាលានេះរៀបចំឡើងក្នុងគោលបំណង ផ្សព្វផ្សាយជូនតំណាងស្ថាប័ន ក្រុមហ៊ុនរោងចក្រ ផលិតករ និងអ្នកនាំចេញនាំចូល ឱ្យបានយល់ដឹង និងស្វែងយល់ពីនិតីវិធីក្នុងការទាញយកអត្ថប្រយោជន៍ជាអតិបរមាពីប្រ័ន្ធអនុគ្រោះនេះ។
យោងតាមអគ្គនាយកដ្ឋានគយន័រវេស ប្រទេសកម្ពុជាទទួលបានការលើកលែងពន្ធតាមប្រព័ន្ធ GSP សម្រាប់ការនាំចេញទៅប្រទេសន័រវេស ក្នុងឋានៈកម្ពុជា ជាប្រទេសអភិវឌ្ឍន៍តិចតួច។
ទំហំពាណិជ្ជកម្មរវាងកម្ពុជា និង ន័រវេស មិនស្ថិតនៅក្នុងចំណោមប្រទេស២០នៅលើតារាងស្ថិតិទំនិញនាំចេញនាំចូលរបស់អគ្គនាយកដ្ឋានគយនិងរដ្ឋាករកម្ពុជានោះទេ ដោយសារតែពាណិជ្ជកម្មទ្វេភាគីមានទំហំតូចពេក។ យោងតាមគេហទំព័រ Trading Economics ទំហំពាណិជ្ជកម្មរវាងប្រទេសទាំងពីរមានតែ ៦,៧១លានដុល្លារប៉ុណ្ណោះ នៅឆ្នាំ២០២២៕
សិក្ខាសាលានេះបញ្ចប់នៅថ្ងៃខែឆ្នាំដដែល ក្រោមបរិយាកាសរីករាយនិងលទ្ធផលផ្លែផ្កាគួរជាទីគាប់ចិត្ត។
