រដ្ឋធានីវៀងចន្ទន៍៖ នាព្រឹកព្រហស្បតិ៍ ៨កើត ខែអស្សុជ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី១០ ខែតុលា ឆ្នាំ២០២៤ អ្នកឧកញ៉ា គិត ម៉េង ប្រធានសភាពាណិជ្ជ​កម្ម​កម្ពុជា​និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា អញ្ជើញចូលរួម និងថ្លែងសុន្ទរកថា កម្មវិធីអាហារពេលព្រឹក​ស្វែងរក​ដៃគូ​នៃ​កិច្ចប្រជុំ​កំពូល​ធុរកិច្ចនិងវិនិយោគអាស៊ានឆ្នាំ២០២៤។

ថ្លែងក្នុងឱកាសនៃពិធីនេះ អ្នកឧកញ៉ាប្រធាន បានជម្រាបជូនប្រមុខរដ្ឋាភិបាល អំពីតួនាទី​ដ៏សំខាន់របស់វិស័យឯកជនក្នុងការលើកកម្ពស់តំណភ្ជាប់តំបន់មេគង្គ។ អ្នកឧកញ៉ា បានគូសបញ្ជាក់អំពីសក្តានុពលនៃការអភិវឌ្ឍហេដ្ឋរចនាសម្ព័ន្ធ និង សមាហរណ​កម្មតំបន់ ដែលក្នុងនោះធុរកិច្ចកម្ពុជា បានទទួល​ផលប្រយោជន៍​រួចមកហើយពី ការលើកកម្ពស់តំណភ្ជាប់នេះ ជាពិសេស សេដ្ឋកិច្ចឌីជីថល។

អ្នកឧកញ៉ាប្រធានក៏បានសង្កត់ធ្ងន់អំពីសារៈសំខាន់នៃការអភិវឌ្ឍប្រកបដោយចីរភាព និងបរិយាប័ន្ន និង ជំរុញឲ្យពង្រីក​ផលប្រយោជន៍​នៃតំណភ្ជាប់នេះ​ទៅដល់​សហគ្រាស​ធុនតូន​និងមធ្យមផងដែរ ដោយបានស្នើថ្នាក់ដឹកនាំ ផ្តល់អាទិភាព​មិនត្រឹមតែលើ​ហេដ្ឋារចនាសម្ព័ន្ធប៉ុណ្ណោះទេ គឺថែមទាំងមនុស្ស សហគមន៍ និង ការប្រតិបត្តិធុរកិច្ច​ប្រកប​ដោយចីរភាពផងដែរ។