រាជធានីភ្នំពេញ៖ នាល្ងាចថ្ងៃអង្គារ ៦រោច ខែពិសាខ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី២៨ ខែឧសភា ឆ្នាំ២០២៤ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជានិងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា អញ្ជើញចូលរួមជំនួបពិភាក្សាអាហារពេលល្ងាចធុរកិច្ចកម្ពុជា-បារាំង ដែលសហការរៀបចំដោយ សភាពាណិជ្ជកម្មកម្ពុជា និង សភាពាណិជ្ជកម្មនិងឧស្សាហកម្មបារាំងនៅកម្ពុជា។ ជំនួបពិភាក្សាមានការអញ្ជើញចូលរួម ពីនាយកប្រតិបត្តិក្រុមហ៊ុនធំៗរបស់បារាំងនិងកម្ពុជា ជួបជជែកពិភាក្សា ផ្លាស់ប្តូរបទពិសោធន៍ ចែករំលែកព័ត៌មានអំពី កាលានុវត្តភាពធុរកិច្ច ស្ថានភាពទីផ្សារ និង ពិនិត្យលទ្ធភាពសហការរឿងគម្រោងរួម។