គណៈប្រតិភូសភាពាណិជ្ជកម្មកម្ពុជាចូលរួមជំនួបពិភាក្សាការងាររវាងក្រុមប្រឹក្សាអភិវឌ្ឍន៍កម្ពុជា ជាមួយសម្ព័ន្ធសភាមិត្តភាពកម្ពុជា-ជប៉ុន
10 May, 2024 09:17 AM | 3 months ago
![គណៈប្រតិភូសភាពាណិជ្ជកម្មកម្ពុជាចូលរួមជំនួបពិភាក្សាការងាររវាងក្រុមប្រឹក្សាអភិវឌ្ឍន៍កម្ពុជា ជាមួយសម្ព័ន្ធសភាមិត្តភាពកម្ពុជា-ជប៉ុន](https://cccbic.org/news/175-news.jpg)
![](/storage/photos/1660/aa2.jpg)
![](/storage/photos/1660/aa3.jpg)
![](/storage/photos/1660/aa4.jpg)
![](/storage/photos/1660/aa5.jpg)
គណៈប្រតិភូសភាពាណិជ្ជកម្មកម្ពុជាចូលរួមជំនួបពិភាក្សាការងាររវាងក្រុមប្រឹក្សាអភិវឌ្ឍន៍កម្ពុជា ជាមួយសម្ព័ន្ធសភាមិត្តភាពកម្ពុជា-ជប៉ុន
ទីក្រុងតូក្យូ, ជប៉ុន៖ នាល្ងាចថ្ងៃអង្គារ ទី៧ ខែឧសភា ឆ្នាំ២០២៤ ឯកឧត្តមបណ្ឌិត តាន់ មុនីវណ្ណ អនុប្រធានសភាពាណិជ្ជកម្មកម្ពុជា តំណាងដ៏ខ្ពង់ខ្ពស់ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា បានដឹកនាំគណៈប្រតិភូសភាពាណិជ្ជកម្មកម្ពុជា អញ្ជើញអមដំណើរ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា ចូលរួមជំនួបពិភាក្សាការងារជាមួយឯកឧត្តម Imamura Masahiro ប្រធានសម្ព័ន្ធសភាមិត្តភាពកម្ពុជា-ជប៉ុន ក្នុងគោលបំណងផ្លាស់ប្តូរយោបល់ស្តីពីកិច្ចសហប្រតិបត្តិការនាពេលអនាគតរវាងក្រុមប្រឹក្សាអភិវឌ្ឍន៍កម្ពុជា និងសម្ព័ន្ធសភាមិត្តភាពកម្ពុជា-ជប៉ុន។
ក្នុងជំនួបនាឱកាសនេះ ឯកឧត្តមឧបនាយករដ្ឋមន្ត្រី បានថ្លែងអំណរគុណជូនចំពោះភាគីមិត្តដែលតែងតែផ្តល់នូវភាពស្និទ្ធស្នាលជាមួយរាជរដ្ឋាភិបាលកម្ពុជារាប់ចាប់តាំងពីនីតិកាលដែលដឹកនាំដោយសម្តេចតេជោអតីតនាយករដ្ឋមន្ត្រី រហូតមកដល់នីតិកាលដែលដឹកនាំដោយសម្តេចធិបតីនាយករដ្ឋមន្ត្រី។ ទន្ទឹមនឹងនេះ ឯកឧត្តមឧបនាយករដ្ឋមន្ត្រី បានរំលឹកឡើងវិញអំពីការចូលរួមចំណែករបស់រដ្ឋាភិបាល និងប្រជាជនជប៉ុនក្នុងការអភិវឌ្ឍសង្គម-សេដ្ឋកិច្ចលើគ្រប់វិស័យ ដែលការណ៍នេះ ជាកាយវិការប្រកបដោយមេត្រីភាពដែលបានឆ្លុះបញ្ចាំងអំពីការរឹតចំណងកិច្ចសហប្រតិបត្តិការរវាងកម្ពុជា និងជប៉ុនឱ្យកាន់តែរីកធំធាត់។ ស្របគ្នានេះផងដែរ ឯកឧត្តមឧបនាយករដ្ឋមន្ត្រីក៏បានស្នើសុំដល់សមាជិកសម្ព័ន្ធសភាមិត្តភាពកម្ពុជា-ជប៉ុនទាំងអស់មេត្តាផ្តល់កិច្ចសហការជួយបញ្ជ្រាបការឈ្វេងយល់អំពីបរិយាកាសវិនិយោគនៅកម្ពុជាទៅកាន់សហគមន៍ធុរកិច្ចនានានៅប្រទេសជប៉ុន សំដៅទាក់ទាញសហគ្រាសដែលមានសក្តានុពលឱ្យមកពង្រីកខ្សែច្រវាក់ផលិតកម្ម ឬខ្សែច្រវាក់ផ្គត់ផ្គង់របស់ខ្លួនមកកាន់កម្ពុជានាពេលអនាគត។
ជាការឆ្លើយតប ឯកឧត្តមប្រធានបានសម្តែងនូវក្តីសោមនស្សរីករាយយ៉ាងក្រៃលែងដែលបានជួបពិភាក្សាការងារជាមួយគណៈប្រតិភូរបស់ក្រុមប្រឹក្សាអភិវឌ្ឍន៍កម្ពុជានាឱកាសដ៏មនោរម្យនេះ។ ឯកឧត្តមប្រធានក៏បានសម្តែងនូវការគាំទ្រលើរាល់មតិយោបល់ល្អៗរបស់ភាគីកម្ពុជា ព្រមទាំងពិនិត្យលទ្ធភាពក្នុងការផ្សព្វផ្សាយកិត្តិស័ព្ទកម្ពុជា ក៏ដូចជាកាលានុវត្តភាពវិនិយោគនៅកម្ពុជាឱ្យកាន់តែទូលំទូលាយជ្រាបចូលដល់ស្រទាប់ធុរកិច្ចរបស់ប្រទេសជប៉ុនផងដែរ។
![Post details 1](https://cccbic.org/ads-banner/banner-1724050901.jpg)