ថ្ងៃព្រហស្បតិ៍ ១១រោច ខែផល្គុន ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី០៤ ខែមេសា ឆ្នាំ២០២៤ វេលាម៉ោង ០៨:៣០នាទីព្រឹក នាក្រសួងរ៉ែ និងថាមពល មានរៀបចំកិច្ចប្រជុំក្រុមការងារ “ញ” “ផ្នែកថាមពល និងធនធានរ៉ែ” នៃវេទិការាជរដ្ឋាភិបាល-ផ្នែកឯកជន ក្រោមអធីបតីភាពសហប្រធានក្រុមការងារទាំងពីរគឺ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល និងជាសហប្រធានក្រុមការងារ “ញ” តំណាងផ្នែករដ្ឋាភិបាល និង ឧកញ៉ា អ៊ុន យុទ្ធី អនុប្រធានសភាពាណិជ្ជកម្មកម្ពុជា និងជាសហប្រធានក្រុមការងារ “ញ” តំណាងផ្នែកឯកជន នឹង តំណាង អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានសម្របសម្រួលក្រុមការងាររួមផ្នែកឯកជន។ កិច្ចប្រជុំនេះក៏មានការចូលរួមផងដែរពីសំណាក់តំណាងមន្ត្រីពាក់ព័ន្ធនៃក្រសួងរ៉ែ និងថាមពល, អនុសហប្រធានក្រុមការងារ “ញ” ទាំងផ្នែករដ្ឋាភិបាល និងផ្នែកឯកជន, តំណាងមន្ត្រីក្រសួង ស្ថាប័នពាក់ព័ន្ធ, តំណាងសមាគមថ្មសំណង់កម្ពុជា, តំណាងសមាគមឧស្សាហកម្មស៊ីម៉ង់កម្ពុជា, សមាគមអ្នកចិញ្ចឹមសត្វកម្ពុជា, សមាគមស្បែកជើងកម្ពុជា, សមាគមអ្នកវាយថ្មសំណង់កម្ពុជា, សមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា, សមាគមអគ្គិសនីជនបទកម្ពុជា, តំណាងក្រុមហ៊ុនឯកជនក្នុងវិស័យរ៉ែនិងថាមពល និងសមាជិក សមាជិការនៃក្រុមការងារ “ញ” ជាច្រើនទៀតផងដែរ។